快樂將台語演講湠甲每一個角落   陳麗香

平安逐個好，我就是台中台語演講會會長：陳麗香
　

歡喜的代誌愛先報乎逐個知，去年春季演講比賽，阮會內，昆澤兄取回了講笑諧比賽冠軍，彩美姐專題演講嘛取回第二名。秋季台中台語演講會，派了二位資深的成員，去台北參加全國台語幽默演講比賽，甲講評人比賽，嘛取回冠軍甲第三名。智恩兄加入台語演講會已經有六年囉！耀州兄嘛有五年的資歷。恭喜伊兩個，麗香還擱愛好好啊綴裀學習。因為阮的行程早就安排好，需要載孩子去高雄讀冊，無法度去甲裀加油、鼓勵，感覺真歹勢嘛真抱歉。

        因為有優秀的成員，乎阮佇台語會運作起來卡輕鬆，乎阮更加充滿了信心、充滿了活力、更加希望將台語演講的技巧、推廣出去，運用惦學校、機關、團體、乎每一個演講者，受到尚大的肯定甲尚大的鼓勵。麗香再一次感謝昆澤兄、智恩兄、耀州兄、彩美姐感謝您逐個。台中台語演講會，有這呢啊好的成績，是毎一位成員努力的結果啦！包括會前賽，幹部檢討甲訓練，還有互相鼓勵，才有法度連續兩年攏有好成績。麗香身為台中台語演講會的會長，感覺非常的光榮，希望對台語演講運作，有興趣的人緊來加入學習。期待今年會凍訓練擱卡最人，參加台語演講比賽。
　

佇阮台語演講會內面，有三項真重要的原則
         (一)無宗教的困擾
         (二)無派系的爭吵
         (三)黃色言語無駛講。
　

演講會議中：阮逐個攏用台語發音。分做幾個單元來進行：
       （一）個人專題演講。
       （二）即席演講
       （三）幽默演講
       （四）優美台語雙向對話(有當時啊嘛有台語歌遙唸唱、台灣諺語等)
       （五）講評人
       （六）主持人
       （七）計時員
       （八）語言評論員
　

歡迎您遍若有閒，加減介紹朋友來甲阮逐個捧塲。
　

麗香參加台語演講會的資歷較淺，真光榮今年被選為會長，阮會好好檢討，為何成員一直無法度增加，到底是推行上的缺失，或者是節目安排無好聽，經過了幹部會後討論的結果，應該是需要加強宣導，深入校園，深入社團，甚至主動出擊，乎擱卡最人知影，有這個優質的演講會。咱攏是熱愛這塊土地的平凡人，只要肯努力阮相信皇天不負苦人。阮知影，愛分分秒秒認真過日子，嘛愛時時刻刻歡喜推行台語演講。感恩著有遐呢啊最人的祝福，感謝著有遐呢啊最人的鼓勵，佇演講會內面，阮逐個親像一家人，時常攏感覺溫暖甲快樂。麗香會更加努力將台語演講，用快樂的方式湠甲每一個角落。咱若有願就有夢，有夢尚水啦！因為希望就是心中的太陽。