2026題目【是愛抑是害?】

媽， 我阿榮啦， 你寄來的鐵牛運功散我已經收著矣。

請問在座的觀眾朋友，你敢有( kám-ū)看過這ê電視廣告? 有ê請攑手。按呢咱的年歲差不多。毋知的朋友嘛無要緊。今仔日我毋是欲來拍拳賣膏藥，是欲來講阿榮的故事啦。

阿榮的媽媽生4个查某囝一直到42歲才生這个後生，平常時仔一个錢拍24ê結，這擺真慷慨m̄-niā（毋但）請厝邊頭尾食油飯閣佮一支雞腿和兩粒紅卵喔。阿榮ê爸母無讀冊毋捌字，但是做生理賣金紙拍拚閣勤儉，趁來的錢毋是買厝就是儉金仔角，日子其實袂歹過。阿榮自細漢就𠢕讀冊，佇這款重男輕女的家庭，爸母共（kā）全部的資源攏予阿榮這个孤囝。阿榮 佇厝裡啥物工課攏免做，逐 ta̍k 項都有人替伊款便便。

※ 爸母的愛予阿榮變成一个「讀冊上重要，啥物攏袂曉」的少爺。爸母偏心特別疼後生，予囡仔感覺家己有特權，接受別人ê服務是當作是應該的，其實教囡仔 和兄弟姊妹做伙「鬥跤手」，m̄-niā（毋但）會當培養責任感，對家庭嘛較會kāng-sim（ほ心）。可惜阿榮攏無學著。

阿榮19歲，老爸雄雄心臟病過身，伊的老母共（kā）生理收起來，店面稅出去，開始過著退休的生活。阿榮呢? 冊嘛無愛讀矣，做兵退伍了後，食頭路攏食袂牢，一年換二十四个頭家。規氣家己做頭家，毋免予人管。(停) 來，逐家來臆看覓咧（mai e）伊的創業基金對佗位來? 無毋著 恁真𠢕臆，就是共（kā）老母討錢去做生理。有一句話講:「狀元囝好生，生理囝歹生。」做生理哪有遐爾 hiah-nī  簡單，尤其是一个予人倖歹去的阿舍囝，平常時仔過著食清領便的生活。做生理失敗是必然的結果。

其實人ê路途起起落落，失敗嘛無要緊，俗語講: 「拍斷手骨顛倒勇」失敗是自我成長的好機會，若是會曉檢討失敗的原因， 繼續學習做生理的鋩角，總有成功的一工。恁講著毋著啊? 可惜阿榮無檢討家己，千錯萬錯攏是別人ê毋著，怨天怨地、怨社會，了錢無咧驚，因為彼毋是伊辛苦趁來的錢，心袂疼，閣討就有矣。伊定定講ê兩句話: 「仙人拍鼓有時錯 ，跤步踏差啥人無」，就按呢 做生理失敗煞suah變成是老母愛賣厝來替伊承擔。

※    爸母的愛予阿榮當做是金庫，伊認為老母的錢就是伊的錢，爸母疼囡仔寵倖過頭，到底這是愛? 抑是害咧? 故事ê 結局「用跤頭趺想嘛知」當然是做一項了一項，了錢就賣厝，最後共（kā）老母ê財產敗了了閣負債累累， 變成一个了尾仔囝。

像阿榮這款故事絕對毋是有史以來第一个，也無可能是最後一个。為什麼我敢按呢講?因為我在幼兒園教書30年， 教過的囡仔無10萬嘛有2萬。

相信逐家攏知影咱台灣每一年出世ê 紅嬰仔愈lu來愈lu少，舊年無夠11萬个呢。遮个囡仔每一个攏是爸爸媽媽、阿公阿媽ê心肝寶貝，我煩惱ê毋是生幾个? 我煩惱的是:遮ê囡仔毋知會出偌濟个阿榮?

阿榮ê 故事予我感受特別深。我希望這个故事會當予在座ê爸爸媽媽、阿公阿媽一个提醒

「倖豬夯灶，倖囝不孝」。家庭教育真正足重要。好、最後閣予逐家臆一擺，「阿榮」是我的啥物人? (停) 無毋著， 恁真𠢕臆。阿榮就是我的爸爸(停)。

※實在講爸爸是一个了尾仔囝，毋是啥物光彩ê代誌，但是我的後生共（kā）我講「䆀材 bái-tsâi 嘛是一種教材，歹管嘛是一枝簫，多謝伊的鼓勵。」

我ê爸爸一出世就提著一手ê好牌，伊有爸母所有的資源，毋過，爸母這款無原則的愛， 無條件的愛，無教伊負責任、無教伊愛感恩，一手好牌煞來輸了了。

所以講，爸母疼惜囡仔的方式，教育囡仔的方式，到底是愛？抑是害？